Италид онгоцны түлшинд хязгаарлалт тогтоожээ

Ойрх Дорнодод үүссэн нөхцөл байдалтай холбоотойгоор Италийн Болонья, Милан, Тревизо болон Венец хотуудын нисэх онгоцны буудлууд агаарын хөлгийн түлшинд хязгаарлалт тогтоожээ.

Агаарын хөлгийн түлш нийлүүлэлтээрээ дэлхийд тэргүүлэгч Air BP компанийн Итали дахь салбар агаарын тээврийн компаниудад 4-р сарын 9-ныг хүртэл онгоцны түлшийг хязгаартайгаар олгоно гэдгээ мэдэгджээ.

Уг хязгаарлалтад яаралтай тусламжийн ба төрийн албаны нислэгүүд, 3-аас олон цаг үргэлжлэх нислэгүүд хамаарахгүй аж.

Иран улс дэлхийн газрын тосны нийт хэрэглээний 20 орчим хувь дамжин тээвэрлэгддэг Ормузын хоолойг хааснаас болж дэлхий даяараа эрчим хүчний хямралтай нүүр тулаад байгаа билээ.

Европын холбооны Эрчим хүчний комиссар Дэн Йоргенсен энэ 7 хоногт Ираны дайн ойрын хугацаанд дууссан ч шатахууны үнэ хэсэгтээ буурахгүй гэдгийг анхааруулсан юм.