Монгол Улс интернэтийн эрх чөлөөгөөр 42-т жагсаж байна

“Cloudwards” порталаас дэлхийн улс орнуудын интернэтийн эрх чөлөөний чансааг гаргалаа. “Mapped: Internet Freedom by Country in 2026” шинэ чансаанаас үзэхэд дэлхий даяар интернэтийн эрх чөлөөний үзүүлэлтүүд унаж байгаа нь засгийн газрууд цахим орон зайг хянахыг хичээж байгааг харуулж байна гэж шинжээчид дүгнэжээ.

Цахим ертөнцөд ямар ч эрх чөлөөгүй орон нь Хойд Солонгос байлаа. Тус улс 0 оноо авсан нь БНАСАУ-д зөвхөн элит дээд дарга нар л интернэт ашигладаг гэдгийг харуулж байна. ОХУ, Пакистан, Иран, Хятад улсууд дөнгөж 4 оноотой сүүл мушгилаа. 20-иос доош буюу эрх чөлөөгүй орнууд Ази, Африк, Европ тивүүдэд байна.

Хамгийн интернэт эрх чөлөөтэй оронд 92 оноотой 11 орон жагссан нь Бельги, Коста-Рика, Зүүн Тимор, Шинэ Зеланд, Дани, Финланд, Исланд, Лихтенштейн, Норвег, Словак, Суринам байлаа.

Ардчиллын өлгий АНУ дөнгөж 64 оноогоор Монгол Улсаас хол хоцорчээ. Монгол Улс 74 оноотой хүснэгтийн 42-т жагссан байна. Их Британи 52 оноо, Өмнөд Солонгос 32 онотой байгаа нь энэ улсын Засгийн газраас цахим орон зайд хяналт тогтоох гэж оролддог гэдгийг харуулж байгаа юм.

“Mapped: Internet Freedom by Country in 2026” чансааг энэ жил 171 оронд хийсэн судалгааны дүнд гаргажээ. 100 онооны системээр дүгнэдэг. Оноог OONI Explorer зэрэг платформ, Freedom House-ийн дүгнэлт, засгийн газрын мэдээлэл, Шүүхийн шийдвэр зэрэг олон газраас авсан мэдээлэлд тулгуурлан гаргадаг. Гол үзүүлэлт нь иргэдийн улс төр, нийгмийн контент саадгүй авах боломж, олон нийтийн сүлжээг чөлөөтэй ашиглах эрх, VPN үйлчилгээ байгаа эсэхийг харгалздаг байна.