Буудлагын ДАШТ-д Монголоос 11 тамирчин оролцоно

Египетийн Каир хотод буудлага спортын насанд хүрэгчдийн дэлхийн аварга шалгаруулах тэмцээн энэ сарын 7-нд эхэлнэ.

11 өдөр үргэлжлэх эл тэмцээнд 71 орны 697 тамирчин оролцохоор мэдүүлэг өгчээ. 56 дахь удаагийн ДАШТ-д манай улсаас Үндэсний шигшээ багийн дасгалжуулагч Ж.Ганхуяг, Д.Оюун нарын удирдлагад урт бууны дасгалд Н.Баяраа, Э.Сайнхүү, Б.Эрхэмбаяр, Г.Нандинзаяа, О.Есүгэн, Т.Золжаргал нар өрсөлдөх бол гар бууны дасгалд Э.Даваахүү, Ш.Буянзаяа, Э.Бадамгарав, Т.Баярцэцэг, А.Ариунзаяа нар цэц сорино.

Буудлага спортын дэлхийн аварга шалгаруулах тэмцээнээс Монголын тамирчдын анхны медалийг 1998 онд хийн гар бууны 10 метрийн дасгалд гавьяат тамирчин Д.Мөнхбаяр хүртсэн түүхтэй. Тэрбээр ганцаарчилсан төрөлд алт, багаараа хүрэл медалийн тавцанд зогсож байлаа. Буудлагын ДАШТ-ээс Монголын баг тамирчид нэг алт, хоёр мөнгө, гурван хүрэл медаль хүртсэн. Тэгвэл олимпын бус төрлөөр болсон ДАШТ-ээс нэг алт, гурван мөнгө, хоёр хүрэл медальтай ажээ.