УИХ-ын дарга Д.Амарбаясгалан албан тушаалаасаа огцрох өргөдлөө өгчээ

"Д.Амарбаясгалан миний бие төрийн ажлыг гацаахгүйн тулд өөрийн хүсэлтээр өргөдлөө өглөө. Өргөдлийг маань УИХ-ын дэргэдэх зөвлөл хэлэлцэж, ТББХ болон УИХ-ын чуулганы товд оруулсан. Байнгын хорооны хуралд 100 хувь саналаар дэмжигдсэн.

Улс төр бол тэмцэл ч шударга, цэвэр байх ёстой. Өнөөдөр Монгол Улс эрх чөлөөт ардчилсан орон байх уу эсвэл хэсэг бүлэг хүн төрийн механизмыг ашиглан парламентыг барьцаалж хүч хэрэглэн дарангуйлалд шилжих эсэх салаа замын уулзарт ирээд байна. Би хүн биш хууль засагладаг засагтай байхын төлөө, нэг хүний өмч биш хамтын удирдлагын төлөө, эрх чөлөөгөө хамгаалахын төлөө МАН-ын даргад өрсөлдсөн. Ингэхдээ ямар их эр ашгийг сөрснийг сүүлийн өдрүүд нотолж байна. Харин МАН-ын даргын өрсөлдөөнд ялагдсан ЕС Г.Занданшатар болон зарим нөхөд намын дүрэм, бага хурлын шийдвэрийг үгүйсгэж, УИХ-ын тухай хуулийг зөрчиж, ор үндэсгүй мэдээлэл гадаадын хэвлэлд нийтэлж, түүгээрээ намайг гүтгэснээ ТББХ-ны хурал дээр хүлээн зөвшөөрсөн. 

Надад албан тушаалтай зууралдах эрх, ёс зүй алга. Өнөөг хүртэл хийсэн хэрэг, шалгуулсан асуудал байхгүй. Би энэ цаг үед өөртөө бүрэн итгэлтэйгээр даргын албан тушаалаасаа чөлөөлөгдөх хүсэлтээ өглөө. Хөшигний ард олон зүйл болж байна. Цаашдаа төрийн үйл ажиллагаа хуулийн дагуу явагдах учиртай. Энэ шийдвэр бол парламентын шударга байдлын төлөө хийж буй нэг үйлдэл юм. ЕС Г.Занданшатарт хандаж хэлэхэд төрийн үйл ажиллагаа тогтвортой, саадгүй байлгахын тулд хоёулаа хамт огцрох нь зүйтэй.

Ерөнхий сайд болон УИХ-ын дарга хоёр огцорсны дараа МАН-ыг бэхжүүлэх болно. Сөрөг хүчин АН-ын байр суурийг хүлээн авч, өөрийн хүсэлтээр чөлөөлөгдөх хүсэлтээ өгсөн. Би бууж өгч байгаа асуудал биш, харин ажлаа өгөөд цэгцлэх шаардлагатай зүйлсэд анхаарлаа хандуулан ажиллах болно" гэсэн юм.